اجنن وعيش مبسوط

تعالي رروق بس.. وقولي
انت عاوز تبقى مبسوط ولا لأ ؟
--اكيد طبعا
بس ازاي!!!! مش شايف الدنيا عامله ازاي !!!!
ولا انت من كوكب تاني !!!


براحه بس علي مهلك ياسيدي ..
أنا معاك حتى مش اسمه كوكب الأرض كمـــــــان ؟


طيب ايه رأيك في المقوله بتاعة

المجانين في نعيم


--ياسلام عليك هو ده اللي انا عايز اقوله
ما احنا لو كنا مجانين
مش فاهمين اي حاجه كان زماننا عايشين مبسوطين

إنما المشكلة اننا بنحس و بنتأثر
و بنعرف كل المصايب اللي بتحصل حوالينا
ياراجل ده احنا لو ما اتأثرناش ما يبقاش عندنا دم
و لا نكون بشر من أصله




ذو العقل يشقى في النعيم بعقله واخو الجهاله في الشقاوه ينعم

عارفه انك نفسك تنعم زي اخو الجهاله
- ياريتني كنت ما بحسش أو جاهل لا ليا في الطور و لا الطحين
اهه هكون جاهل بس كنت هبقى مبسوط
و مش حاسس اني جاهل أصلا !!
بس نعمل ايه اذا كنت انا ربنا رزقني العقل والعلم
يعني اتبسط ازاي وانا بشوف كل اللي بيحصل ده
طيب ايه رأي جنابك في اللي يخليك تحس باللي بيحصل حواليك
و تعرفه كله
لكن ما تتأثرش بيه
و لا يجيلك إحباط و قرف و زهق


-- مممم مع اني شاكك في كلامك
بس مايضرش اسمعك
مش هنخسر حاجة
اطربنا يا سيدي و "المية تغرق القرطــــــــاس"

طيب بص ياسيدي
سمعت انت بيت الشعر اللي بيقول :
ليس الغبي بسيدٍ في قومهِ ... لكن سيد قومه يتغابى

بصراحه البيت ده عاجبني جدا
صحيح مش من الذكاء انك تبقى "حِمَقِي"
و كل حاجة تعلق عليها و تدخلها فـ "نافوخك"
ياعم سيبها تعدي "بمزاجك"
بدل ما
تنرفزك و تعصبك و خلاص
و انت راجل "صاحب مرض" و الانفعال مش كويس علشــــــــــانك

في احصائيه عن الـ stresses
بتقول تقريبا 50% من المشاكل والعصبيه
اللي بتجيلنا كل يوم
ممكن نتجنبها بـ

التجاهل

يعني مثلا نزلت الشارع و حسيت ان جاركو ده بيتكلم عليك
أو جارتك دي بتبصلك بصه مش تمام
أو حتى واحد بيرمي بالكلام عليك
ساعتها ياما انك تمسك في خناقه زي "الأهبل "
و هيقولو ايه الراجل العبيط ده
حد عمله حاجة و لا حد وجه له كلام !!!
أو"تكتم" في نفسك و"تكز" على سنانك طول ما انت ماشي
و تقعد تشتم فيهم و تلعن الجيرة "السو"
اللي في شارعكم دي
أو الناس و لاد الـ***(حزف من الرقابه )
اللي ماسكين الرايح و الجاي "لبانة" في بقهم
أو ممكن مواقف زي زحمة مواصلات رخامة سواقين
أو أي حاجة من الحاجات دي
بتنرفزك و "بتعككنن" عليك يومك , صح ؟
بص ياحج لو حرقة دمك دي هتخليهم يسكتوا
أو هتخفف عنك الزحمة
أو القرف اللي حواليك
انا معاك يا سيدي
ولع في دمك و في نفسك كمان
إنما المشكلة انها ما بتحلش أو بتفيد أي حاجة
بالعكس
هي يتزيد قرفك و زهقك كمان و كمان

يبقى انت تخلي ناس زي دول أو مواقف زي دي يعملوا فيك كده ليييييييييييه ؟
رد عليا .. انطق يا جبان

-- ممممم , يعني أسكت لهم ؟ يعني ؟
ما هو انت لو ما سكتش هتبقى زي الاهبل اللي بيخانق دبان وشه
و مش هتخلص من المواقف اللي زي دي لأن
" انت اكيد اكيد في مصر"

الحل ايه ياسيدنا الافندي ؟؟

تسكت
و ما تحرقش دمك
و
اصبر على كيد الحسود فإن كيدك قاتله
فالنار تأكل نفسها إن لم تجد ما تأكله

يبقى انت ما تحرقش دمك
و حاول تستمتع بعظمة تحكمك في نفسك
و تغلبك على الضغوط و ماتشغلش بالك


just
let things go
وابتسم

تفتكر انت من حقك تعيش في الدنيا دي مبسوط ؟؟


طيب ليه تخليها تمسح ابتسامة تصبح رمز ليك
للتفاؤل والأمل؟؟


ايه رأيك في حكايه التجاهل دي ؟؟


تفتكر التجاهل ينفع في كل المشاكل ولا في حاجات ماينفعش فيها تجاهل ؟؟

شكرا

ما شاء الله أبداع بلا حدود و بانتظار أبداعاتكالقادمة

موضوع جميل
دوختنا كنا هنتجنن
هع هع